Nakaangkon pangos ug bun-og sa kalawasan ang sakay sa usa ka Hi-Ace Van human nga nahaybol kini samtang naglawig sa kadalanan sa Marilog Dist.ning syudad sa Davao.
Subay sa report gikan sa kapulisan pasado alas dusi ang takna kagahapon sa hapon, usa ka Toyota Hiace commuter van ang nalambigit sa disgrasya nga gimaneho sa usa ka Magante Joeffrey Zabala,34-anyos, nga residente sa Zone 5, Bulua Cagayan De Oro City.
Sa imbistigasyon sa kapulisan, ang maong sakyanan ang nagsubay sa Davao Bukidnon National Highway nga gikan sa sentro nga bahin sa dakbayan sa Davao ug dalang Bukidnon.
Apan, pag-abot niini sa dalan nga anaa sa Sitio Lanitum, Barangay Malamba, atubangan sa Anas Farm, sumala pa sa drayber nga nikalit lamang og ka-swerved kon kabig ngadto sa pikas bahin ang iyahang gimanehong sakyanan gumikan sumala pa sa kadanlog sa dalan.
Tungod niini, nawad-an ang drayber og kontrol ug ang iyahang gimanehong sakyanan napadulong sa open creek,kon gamayng sapa sa kilid sa karsada ug napadulong pa kini sa kural sa propedad sa usa ka Dennis Valenzuala.
Gumikan sa maong panghitabo, ang kauban sa drayber nga si John Carl Campos,20-anyos ang naangol ug daling gidala sa Southern Philippine Medical Center (SPMC) aron nga patambalan.
Samtang ang drayber, swerteng wala napuruhan kon naangol sa maong panghitabo. Gitambagan na lamang kini sa kapulisan nga maghinay-hinay lamang sa pagpadagan danlog ang kadalanan gumikan sa mga pag-ulan.
