DAVAO CITY – Patay ang duha ka mga bata sa dihang mibusikad ang usa ka gituohang granada sa Purok 6 Boongon, Barangay Rizal, Lungsod sa Malalag, Davao Del Sur alas 11:00 sa buntag kagahapon.
Ang mga biktima nailang si Christian Jay Gecale Gaspar, 7 anyos, grade 1 pupil ug si Kent Gecale Gaspar , 5 anyos, pulos lumolupyo sa Purok 6 Boongon, Barangay Rizal sa maong lungsod.
Subay sa gihimong inisyal nga imbestigasyon sa Malalag Municipal Police Station, nasayran nga ang nahisgutang mag igsoon ang nagdula sa sagbutang bahin sa maong lugar ug aduna matud pa silay nakit-an nga usa ka lingin nga metal nga gituohang hand grenade.
Gumikan sa kakuryoso, gikuha kini sa mga bata ug ilang gidala duol sa lubnganan sa ilang lola sa tuhod ug gidulaan kini.
Sa wala damha nga panghitabo, kalit lamang nga adunay usa ka buto ang nadungog sa lola sa mga bata nga anaa sulod sa ilang panimalay.
Paggawas sa apohan, didto na nasayran nga granada ang mibusikad diin iya na lamang nakita ang lawas sa mga bata.
Gilayon kini nga nagpakitabang apan dead on the spot si Christian Jay Gecale Gaspar samtang ang iyang igsuon nga si Kent Gecale Gaspar ang gidala sa Southern Philippines Medical Center aron matambalan apan pipila ka minuto lamang ang nakalabay, nakabsan sab kini sa kinabuhi.
Ning kasamtangan, wala pa masayri kung asa gikan ug kung kinsa ang nanag-iya sa maong granada nga gidulaan sa duha ka bata.
Via || Allianne Ferandos Silao
