DAVAO CITY – Hugtanong gikondena karon sa Bangsamoro Human Rights Commission ang kamatayon ni Amier Mangacop, usa ka 19 anyos ug Grade 9 student kinsa gikatahong napusilan sulod sa pito ka higayon sa usa ka non-uniformed personnel ug doktor sa Police Regional Office XI nga si Dr. Marvin Rey Andrew Pepino.
Sa gipagawas nga opisyal nga pahayag sa Bangsamoro Human Rights Commission, nagpahinumdom kini nga angayang walay mahikawan og kinabuhi ingon man kagawasan nga walay due process of law.
Gikanayon sab niini nga kinahanglan ang mga personahe ug miyembro sa pwersa sa kapulisan ang adunay responsibilidad nga protektahan ang mga indibidwal labi na ang mga kabatan-onan gikan sa mga dili maayong buhat nga makahimo sa paglapas sa tawhanong katungod.
Subay niini, isip human rights institution sa Bangsamoro, nanawagan og hustisya ang BHRC alang sa kamatayon ni Amier.
Nanawagan sab kini sa PRO XI ug sa uban pang mga hingtungdang ahensya alang sa impartial, non-discriminatory, patas ug paspas nga imbestigasyon sa kamatayon sa biktima.
Gipamugos usab sa BHRC nga dili nila itugot nga dili maangkon ang hustisya.
Via || Allianne Ferandos Silao
