DAVAO CITY – Wala pay nadawat nga mandato ang DSWD XI gikan sa central office sa Department of Social Welfare and Development (DSWD) ingon man sa bag-ong kalihim sa maong ahensya nga si Sec. Erwin Tulfo kalabot sa mga lakang o mga programa nga planong ipatuman.
Kahinumduman, gihisgutan ni DSWD Sec. Erwin Tulfo niadtong nakalabay nga adlaw ang mahitungod sa plano niini nga “cleansing” o paglimpyo sa listahan sa mga benepisyaro sa Pantawid Pamilyang Pilipino Programs (4ps) diin subay sab kini sa mando kaniya ni Pangulong Ferdinand Bong bong Marcos Jr.
Sa pakighinabi sa Bombo Radyo Davao kang Michelle Franca, OIC Social Marketing Unit DSWD XI, nasayod na matud pa ang kadaghanan sa mga benepisyaryo sa 4Ps nga ang cleansing o ang paglimpyo sa listahan ang kaniadto pa nga kanunay ginahimo tungod kabahin kini sa sistema sa maong programa nga mao ang pag revalidate.
Gipasabot ni Franca nga daghang hinungdan o kondisyon diin mamahimong mailisdan o matanggal ang usa ka benepisyaryo sa 4Ps.
Ilalom sa Republic Act 11310 ang mga exit conditions sa 4Ps beneficiaries mao ang musunod:
– Kung lagpas na sa pangidaron 0-18 years old ang usa ka bata- Monitored children nga migradwar na sa Senior High School/ College
– Anaa na sa self sufficiency level o aduna nay paglambo sa kinabuhi sa pamilya diin nag-voluntray exit na sa programa aron mahatagan og tyansa ang ubang pamilya nga mas nanginahanglan og tabang
– Matanggal sab sa programa ang mga magpabadlong nga mga benepisyaro ilabi na kung miabot na sa 3rd warning ang ilang misbehavior sama sa nasakpang nagasugal ug nag-prenda sa ilang cash card.
Gitataw ni Franca nga bisan wala pay mando gikan sa opisina ni Sec. Tulfo, nagpadayon gihapon ang sistema sa 4Ps sa pag re-validate ug paghinlo niini.
Giklaro sab niini nga ang sistema sa pagpili sa mga benepisyaryo sa 4Ps ang gikan gayud sa listahan ug dili mismo sa 4Ps, diin lahi ang opisina o ang programa alang sa listahan.
Busa, daghang kondisyon ug proseso ang angayang lantawon alang sa pagpasulod ug pagpagawas sa maong programa, diin propesyonal kining gitun-an sa mga Social Welfare Workers.
