DAVAO CITY- Ginahikay na sa Ecoland Police Station Traffic Enforcement Unit ang tukmang kaso nga ipasaka ngadto sa usa ka lalaki nga nakabangga og usa ka estudyante samtang mitabok kini sa pedestrian lane sa Guillermo Torres (Sandawa) Street kanto Mc Arthur Highway pasado alas 5:15 kaganihang buntag.
Subay sa pakighinabi sa Bombo Patrol ngadto kang Police Master Sgt. Lowell Galupe sa Highway Patrol Group Unit, nasayran nga lango sa ilimnong makahubog ang drayber nga giilang si Mark John Catulong, 30 anyos, samtang nagsubay kini sa dalan sa Sandawa, Ecoland.
Dugang pa niini nga pula ang suga sa stop light nga timailhan nga gikinahanglan nga muhunong ang mga sakyanan apan ang drayber nga lango, nag beating the red light. Kini ang subay sab sa saysay sa mga nakakita sa maong panghitabo samtang mitabok sa center island ang amahan ug anak nga paingon unta sa tulonghaan.
Nasayran nga nagtungha sa Daniel R. Aguinaldo National High School ang nahisgutang estudyante nga giilang si Earl John Manalang, 14 anyos.
Sa pakighinabi sa amahan sa biktima nga si Edlen Marcilla Manalang, 41 anyos, gihingusgan niini nga magpasaka gayud sila og kaso batok sa suspek sa paglapas niini sa RA 4136 o reckless driving resulting to physical injury aron magsilbi usab kini nga leksyon sa suspek.
Anaa na karon sa kustodiya sa kapulisan ang dinakpan. Samtang sa kabahin sa nakabangga, wala na kini mihatag og pahayag apan miingon kini nga nalouy kuno siya sa iyang ginikanan diin matod pa niini nga siya usab bugtong anak ug bread winner sa pamilya.
Nasayran sab nga ang nahisgutang driver ang gikan pa nagtugtog gumikan usa kini ka musikero. Sa pagkakaron, padayon nga nagpaalim ang biktima sa Southern Philippines Medical Center (SPMC) diin nakahiagom kini og kasakit sa iyang tangkugo.
Via || Bombo Danica Baguio
