Gipahibalo sa Department of Health (DOH) nga palapdan pa ang zero-balance billing ug dili na kini limitado sa mga ospital nga gipadagan sa ahensiya lamang.
Sumala kang Health Secretary Teodoro Herbosa, kini usa ka lakang human maaprubahan sa Senado ang dugang pondo sa sugyot nga General Appropriations Bill.
Kung mapirmahan na kini, ang dugang nga P1 billion nga pondo gamiton aron suportahan ang mga level 3 nga ospital nga gipanag-iyahan sa lokal nga mga panggamhanan.
Gipatin-aw sa DOH nga adunay mga kondisyon ang pagpapatuman niini, lakip na ang saktong accreditation sa mga Rural Health Units sa PhilHealth YAKAP program ug ang sakop sa mga pasyente.
Gidugang sa DOH nga ang pondo i-apod-apod base sa populasyon, pasilidad, ug klase sa LGU, ug ipagawas pinaagi sa mga level 3 DOH hospitals sa rehiyon ilawom sa usa ka legal nga kasabutan.
Sa pagkakaron, kapin usa ka milyon ka mga Pilipino na ang nakapahimulos sa zero-balance billing program sa tibuok nasud.
