Nanawagan si Ukrainian President Volodymyr Zelenskiy og mas dali nga aksyon gikan sa mga kaalyado aron mapalig-on ang seguridad sa Ukraine batok sa nagpadayon nga pagsulong sa Russia. Sa iyang panawagan niadtong Biyernes, Agosto 29, gipunting ni Zelenskiy ang pagkinahanglan og mas lig-on nga garantiya, sama sa “NATO-like” nga kasabutan, ug gipahayag usab ang iyang interes nga makig-istorya kang U.S. President Donald Trump bahin sa isyu sa seguridad.
Samtang sa New York, nagkita ang chief of staff ni Zelenskiy nga si Andriy Yermak ug ang U.S. envoy nga si Steve Witkoff aron hisgutan ang mas lig-on nga pagkigbisog kontra Russia. Kini tungod sa bag-ong atake sa Kyiv nga nakapatay og 25 ka katao. Giingon ni Yermak nga hangtod karon, wala gihapon nagpakita og interes ang Russia sa seryosong negosasyon, busa gipangayo niya ang padayon nga tabang gikan sa Amerika ug Europa.
Nagpahayag usab ang mga defense ministers sa European Union nga andam silang suportahan ang plano nga pagbansay sa tropa sa Ukraine sulod mismo sa ilang nasud kon adunay mahitabong pakig-gubat. Sa laing bahin, gi-anunsyo sa Germany ug France ang mas lawom nga kooperasyon sa depensa, lakip na ang pagtukod og missile early-warning system aron mapalig-on ang seguridad sa rehiyon.
