Pinaagi sa mando ni Pangulong Ferdinand Marcos Jr., gitahasan na niini ang mga law enforcement agencies aron sa pagdakop kang kanhi Ako Bicol Partylist Rep. Zaldy Co ug 17 pa ka ka mga kaubanan niining mga indibidwal gikan sa DPWH ug Sunwest Corporation.
Kini human magpagawas ang Ombudsman og arrest warrant batok sa maong mga indibidwal.
Sumala sa Pangulo, pormal nang nagsang-at og kaso ang Office of the Ombudsman batok kang Zaldy Co ug sa ubang 17 ka mga indibidwal.
Kini pinasikad sa mga ebidensiyang gisumite sa Independent Commission of Investigation (ICI) ug sa Department of Public Works and Highways (DPWH).
Matod pa sa Pangulo, klaro ug lig-on ang mga dokumentong nahimong basihan sa pagsaka sa kaso. Dugang pa niya, andam na ang mga awtoridad sa pagpatuman sa mga arrest warrant.
Dakpon ang mga akusado, ipadala sa korte, ug siguraduhong manubag sila sa balaod.
Gisiguro usab sa Presidente nga walay espesyal nga pagtagad ug walay protektahan.
Gibutyag sa Pangulo nga iyang tapuson ang gisugdan niining paglimpyo sa maong anomalya.
Nagpasalamat usab si Pangulong Marcos Jr. sa katawhan sa ilahang taas nga pasensya samtang naghulat sa resulta sa imbestigasyon.
Matod niya, nagsugod na’g pakita ang bunga sa mga lakang sa gobyerno aron masiguro nga adunay tulubagon ang mga tawo nga nalambigit sa kontrobersiya.
