Gibutyag ni Pang. Ferdinand Marcos Jr. nga ang puganteng kanhing magbabalaod nga si Zaldy Co misulay og sulod sa Germany sa dihang siya nadakpan.
Kahinumduman nga kagabii, gipahibalo ni Pangulong Marcos nga si Co nadakpan sa mga awtoridad sa Czech Republic samtang misulay sa pagtabok sa ilahang border.
Una nang gipangita si Co tungod sa giingong pagdumala sa usa ka dako nga corruption scam nga adunay kalabotan sa peke o bogus nga flood control projects.
Niadtong panahuna, anaa na kini sa nasud bisan og wala pa mibuto ang maong isyu sa media. Gibutyag usab sa Pangulo nga padayon pa ang koordinasyon sa Pilipinas ug Czech Republic.
Nasayran nga wala’y extradition treaty tali sa Pilipinas ug Czech Republic, busa walay obligadong pagturnover sa mga wanted nga kriminal ug suspek tali sa duha ka nasud.
Sumala sa report, si Co anaa sa Europa sulod sa miaging siyam ka bulan, ug bag-o lamang nakita sa Italy.
Gibanabanaan nga binilyon nga kantidad ang nakuha pinaagi sa kickback schemes nga giingong giapilan sa mga magbabalaod ug mga opisyal sa Department of Public Works and Highways. Tungod niini, daghang mga senador ug miyembro sa Kamara ang nalambigit na sa kaso base sa mga pahayag sa mga nag-angkon nga kauban sa maong anomalya.
Samtang posibleng mabalik sa nasud ang puganteng si Elizaldy “Zaldy” Co, nga nadakpan sa Czech Republic sulod sa usa hangtod tulo ka semana
human sa siyam ka bulan nga pagtago sa gawas sa nasud kini ang gibutyag ni Interior Secretary Jonvic Remulla.
Ang kanhing magbabalaod giila nga usa sa mga giingong utok sa likod sa binilyon nga kantidad sa anomalosong flood control ug infrastructure projects niadtong 2025.
Sa usa ka paghinabi, gibutyag ni Remulla nga ang Department of Foreign Affairs (DFA) nakiglambigit na sa Czech authorities alang sa deportation ni Co.
Dugang pa ni Remulla nga pag-abot ni Co dinhi sa nasud, ipailawom kini sa usa ka kumpletong physical examination sa Camp Crame aron matino kung angayan ba siya nga moatubang sa husgado.
