DAVAO CITY – Gisugdan na sa unang batch sa mga nag-apply sa Work for Davao Program ang ilang trabaho diin makadawat ang mga nahisgutan ug dul-an P4,000 ka pesos sulod sa 10 ka adlaw.
Sumala pa kang Commissioner Norman Baloro, tigpamaba sa Work for Davao program ug Eskwela Davao, anaa sa 965 ang unang batch sa mga nag-apply sa programa diin dakong tabang ang ilang madawat nga sweldo sulod sa napulo ka adlaw kini aron nga masustentohan ang ilang adlaw-adlaw nga panginahanglanon.
Gitataw ni Baloro nga gihimo sa lokal nga kagamhanan ang maong lakang sanglit daghanan ang nawad-an ug trabaho o temporaryo nga nahunong ang operasyon sa mga kompanya sukad nga miigo ang corona virus disease kaniadtong bulan sa Marso.
Gikanayong anaa sa 10 ka mga trabaho ang mamahimong kapili-an sa mga benepisiyaryo diin gilangkuban kini sa pagbutang ug foot bath sa ilang barangay, pagpanglimpiyo sa ilang lugar aron malikayan ang dengue ug daghanan pa.
Gitataw sab sa opisyal nga bisan nahimong kabahin sa Social Amelioration Program (SAP) o mipailalom sa TUPAD ang usa ka indibidwal, mamahimo pa gihapon kini nga mo-apply sa Work for Davao program.
