Gikatingala sa mga netizen ang kalit nga pagkawala sa label nga “West Philippine Sea” sa kasadpang bahin sa Exclusive Economic Zone (EEZ) sa Pilipinas sa Google Maps.
Pinaagi sa pagpangita gamit ang Google app, dili na mapalgan ang maong label sa West Philippine sea, samtang pipila lamang ka semana ang milabay, nakita kini sa digital mapping platform.
Karong adlawa ang “West Philippine Sea” makita na lamang isip pin sa Google Maps kung kini ispesipikong pangitaon gamit ang mobile app. Apan kung gamiton ang laptop o desktop, dili na kini makita isip label o pin.
Ang “West Philippine Sea” unang gigamit isip opisyal nga ngalan atol sa termino ni kanhi-Pang. Benigno Aquino III aron ipakita ang soberanya sa Pilipinas sa maong rehiyon taliwala sa padayon nga panghilabot sa China.
Niadtong 2012, mipirma si Aquino og usa ka administrative order aron lig-onon ang katungod sa Pilipinas sa maong lugar.
Subay sa mga miaging report, gimanduan usab ni Aquino ang National Mapping and Resource Information Authority (NAMRIA) nga maghimo ug magmantala og mga mapa ug chart nga nagpakita sa “West Philippine Sea” isip opisyal nga pangalan.
