DAVAO CITY – Nakahiagom ug samad ang usa sa gikonsiderang wanted person human kini nakigbikil sa mga otoridad atol sa pag-aresto kaniya kaniadtong Miyerkules, Pebrero 1, pasado alas-4:10 sa hapon sa Sitio Nagayong, Barangay Mabila, Sarangani, Davao Occidental.
Giila ang suspek nga si Toting Lituang, hamtung, residente sa susamang dapit.
Subay sa report, naglusad og Manhunt Charlie operation ang mga sakop sa Sarangani Municipal Police Station aron arestuhon ang suspek pinaagi sa warrant of arrest nga gipagula sa Regional Trial Court Branch 18 sa Digos City alang sa giatubang niini nga kasong robbery with homicide.
Apan sa dihang dakpon ang nahisgutan, nakahimo siya nga manigbas sa kaatbang nga warrant officer.
Apan, kalit siyang gipabuthan sa usa ka pulis ug naigo ang likod nga bahin sa iyahang lawas.
Gilayong gitabangan ang maong suspek paingon sa Sarangani District Hospital aron magpaayo una siya dalhon sa prisohan alang sa tukmang disposisyon.
via || Bombo LJF
