DAVAO CITY – Walo ka mga retirado ug aktibo nga mga bombero ang patubagon kalabot sa sunog sa NCCC mall nga nakakalas ug 38 ka mga kinabuhi.
Kini ang gihatagan ug katin-awan ni Fire Senior Inspector Jerry Candido, tigpamaba sa Inter-agency Anti-Arson Task Force (IATF) uban sa pagkanayon nga ang resulta sa imbestigasyon sa Inter-agency Anti-Arson Task Force (IATF) ang mopatigbabaw bisan pa kung lahi nga resulta ang ipagula sa mga foreign fire investigators nga gikuha sa kadumalahan sa New City Commercial Center (NCCC).
Sumala pa kang Candido, magpabilin gihapon ang resulta sa ilang imbestigasyon nga electrical short circuit ang tinubdan sa sunog sa mall ug daghanan ang kalapasan nga nahimong ang NCCC ug SSI kalabot sa fire safety standards, labi na ang kapakyas sa fire alarm system, mga water sprinkler, ug ang dili fire proof nga fire exit.
Sumala pa Candido nga duna gayu’y manubag sa nahisgutan nga sunog, lakip na ang mga retirado na sa serbisyo, samtang ang uban aktibo pa sa serbisyo.
Gumikan kini sa pag-issue ug fire safety inspection certificate sa NCCC Mall ug SSI bisan pa kung nakalapas na sa fire code of the Philippines ang mga nahisgutan nga mga balay pamatigayon.
Sa pasi-una nga ihap ni Candido dunay walo ka mga opisyal ug kanhi mga opisyal sa Bureau of Fire Protection ang posibli nga mag-atubang ug kaso. Masaligon ang IATF nga niining bulana makapagula na kini ug report sa ilang imbestigasyon, lakip na ang rekomendasyon niini.
