Gipadayag ni Department of Social Welfare and Development (DSWD) Secretary Rex Gatchalian nga padayon ang paghimo sa pagtuon sa ilang ahensya aron mas mapalambo pa ug mahimong mas epektibo ang Walang Gutom 2027 Program (WGP) alang sa mga pamilya nga kulang sa pagkaon.
Kini ang gipaguwa nga pahayag human sa resulta sa usa ka survey nga nagpakita og pagkunhod sa ihap sa mga gigutom nga benepisyaryo sa maong programa.
Sa pagkakaron, kapin 300,000 ka mga food-poor nga pamilya ang nakadawat og P3,000 food credits matag bulan, nga magamit sa mga aprubadong tindahan.
Gitan-aw usab sa ahensya ang posibilidad nga patas-an ang kantidad sa food credits aron mas mapalambo pa ang benepisyo sa programa.
Gitinguha usab nga mapalapdan ang benepisyaryo ngadto sa 750,000 ka pamilya sa pagsugod sa tuig 2027.
Lakip usab sa ilang plano ang pagbaligya og bugas nga tag-P20 kada kilo alang sa mga benepisyaryo, uban sa suporta sa Department of Agriculture (DA), subay sa mando ni Pangulo Ferdinand Marcos Jr. nga walay angay nga mabiyaan, ilabi na ang mga sektor nga labing nanginahanglan.
