Giangkon ni Bise Presidente Sara Duterte nga nawad-an kini og gana sa pagtubag sa pangutana sa mga kongresista, bisan pa sa pag-awhag sa kadaghanan nga depensahan ang pundo sa Office of the Vice President (OVP).
Sumala ni VP Sara, wala niya makita ang bili sa pagdepensa sa maong pundo tungod kay sa kataposan gimaniobra kini sa duha ka mga opisyal sa Ubos Balay Balauranan nga sumala pa sila si Speaker Martin Romualdez ug Rep. Elizaldy Co.
Dugang niini nga nagsayang sa oras lamang ang pagtubag samtang kompleto na ang direksyon kung asa paingon ang budget.
Samtang gisaysay niini ang kapait sa maong panghitabo gumikan nakigkunsabo matud pa ang liderato sa Kamara sa mga walhong grupo aron lamang isabotahe ang iyang mga programa sa OVP.
Gibutyag usab sa opisyal ang plano nga wagtangon na gayud ang laing bahin sa ilang pundo, bisan og maayo kining gidepensahan sa miaging tuig.
Ang bise presidente midugang usab nga adunay sumbanan sa pag-atake kaniya nga nagsugod sa mga hungihong, mga panagpulong ug paggamit sa mga impluwensya sa mga opisina sa gobyerno aron mahimo siyang target sa pag-atake.
