Milupad na paingon sa The Hague, Netherlands ang manag-suong VP Sara Duterte ug Davao City First District Rep. Paolo Duterte aron duyugan ang ilang amahan nga si kanhi Pangulong Rodrigo Duterte.
Subay sa kompirmasyon nga gipagawas sa Office of the Vice President, migikan si VP Inday Sara gikan sa Manila alas 7:40 kaganinang buntag Marco 12, 2025 sakay sa Emirates flight no. EK 337 paingon sa Amsterdam.
Samtang, mas sayo usab nga migikan si Cong Polong paingon sa The Hague alas 5:45 kaganinang buntag sakay Cathay Pacific gikan sa NAIA Terminal 3.
Lauman nga mosunod usab ug byahe ang mga abogado sa kanhi pangulo paingon sa Netherlands.
Kahinumduman nga pasado alas 10 kagabii sa dihang milupad ang gisakyan nga private jet ni FPRRD paingon sa The Hague human nga kini ang gidakop kagahapon sa buntag.
Ang pagka-aresto kang Duterte sulod sa NAIA sa dihang miabot kini gikan sa Hongkong ang may kalabutan sa gipasang-at nga kaso ngadto sa International Criminal Court (ICC) nga crime againts humanity o ang pasangil nga pagpaluyo niini sa Extra Judicial killings (EJK) sa mga nalambigit sa illegal nga druga sa nasud.
