Nagpahayag sa iyang mensahe si Bise Presidente Sara Duterte alang kang Presidente Ferdinand Marcos, Jr. may kalabot sa nagpadayon nga imbestigasyon sa flood control project human sa pag-resign ni Leyte Rep. Martin Romualdez isip Speaker sa House of Representatives.
Una nang giingon sa bise presidente nga wala siya’y reaksyon bahin sa pagbakante sa posisyon sa maong opisyal, pero nasayod siya nga usa ka maayong tawo si Isabela 6th District Rep. Faustino Dy III, nga mao karon ang bag-ong House Speaker sa Mababang Kapulungan.
Sa laing bahin, nagtuo si Bise Presidente Sara nga planado ang tanang hitabo karon sa gobyerno, ilabina ubos sa liderato ni Pangulong Marcos.
Giingon niya nga ang grupo nila Rep. Martin Romualdez ug Sandro Marcos maoy nagplano kung unsay buhaton sa 2026 national budget, isip pangandam sa Presidential Elections sa 2028.
Sa laing bahin, nagpagawas usab og pamahayag si Acting City Mayor Baste Duterte nga may kalabot sa bag-ong liderato sa Senado.
Matod niya, murag ginatuyok o giusab sa administrasyon ang istorya aron malikayan ang pagbasol sa presidente, pinaagi sa pagpuli sa liderato.
Dugang pa sa alkalde, dili kini solusyon sa mas dagkong problema sa nasud sama sa gibaligya nga gold reserves ug sa mga isyu sa PhilHealth.
Ang padayon nga kagawasan sa mga kurakot nga opisyal, matod pa ni Mayor Baste, usa ka dakong insulto sa seguridad ug kalinaw sa Pilipinas.
