Gisaway sa usa ka magbabalaod si Vice President Sara Duterte sa pag-ataki niini sa programa sa gobyerno nga magbaligya ug bugas sa kantidad nga P20 matag kilo ug inay nga malipay gumikan kay mapagaan niini ang gipas-an sa mga ordinaryong Pilipino.
Gipahayag ni House Ad Hoc Committee on Marawi Rehabilitation and Victims Compensation Chairman Zia Alonto Adiong sa Lanao del Sur, kaniadtong panahon sa pagpangatungdanan sa amahan ni VP Sara nga si kanhi Pangulong Duterte, mi-abot sa P70 ang presyo matag kilo sa bugas sa pipila ka lugar ug nagbaligya ang gobyerno ug imported nga bugas nga adunay bukbok sa mga merkado. Kini ang nahimong tubag sa magbabalaod sa nahimong pahayag ni VP Sara kung diin gikanayon niini nga ang pilot testing sa P20 matag kilo sa bugas sa pipila ka bahin sa Visayas ang “too late” na.
Dugang pa niini, ang mga komento ni VP Sara ang nagpahinumdum lamang sa katawhan sa mga kalisdanan nga naagi-an sa mga ordinaryong Pilipino niadtong nakalabay nga administrasyon, ilabi na niadtong misirit ang presyo sa bugas ug nahimong krisis ang seguridad sa pagkaon. Ang gikinahanglan sa usa ka lider ilabi na kung adunay pagtagad sa nasud, mosuporta sa mga gipanghimo aron mapagaan ang kinabuhi sa tawo ug dili ang mangdaot sa pagpaningkamot sa uban.
Samtang gipahayag sa Department of Agriculture nga ang tumong sa pilot program mao ang pag-obserba sa distribution una kini ipatuman sa tibuok nasud aron maseguro ang pagka-sustainable ug accessible niini.
