Gihagit sa mga mambabalaod si Bise Presidente Sara Duterte nga panganlan matud pa ang mga nagpakuyanap og sayop nga mga impormasyon mahitungod sa impeachment issue niini.
Kahinumdumang gikabutyag ni Vice President Sara nga duna kini mga higala nga anaa sa kongreso, kansa nagtaho kaniya nga duna matud pay ginaluto nga impeachment complaint kontra kaniya.
Alayon niini, subli usab nga gipanghimakak sa mga magbabalaod sa KAMARA ang nasampit nga hisgutanan, diin gipamugos ni Deputy Majority Leader ug Iloilo Representative Jannete Garin nga walay kamatuoran ang impeachment plot kontra kang Vice President Sara Duterte.
Dugang niini nga wala matud pa siya’y nadungog nga mga impormasyon mahitungod sa impeachment plot.
Sumala pa usab ni Garin nga dili gayud mawala ang mga indibidwal sa serbisyo publiko nga gusto lang makakuha og atensyon.
Lakip sa mga ninghagit kang Bise Presidente Sara nga ibulgar kung kinsa sa iyang mga higala ang nag solsol kaniya, mao sila si La Union Representative Paulo Ortiga, diin sumala niini nga mas maayo matud pa kung mahibaw-an og kinsa ang nasangpit gna mga indibidwal arun masayran kung duna ba kini pang kaugalingon lang nga interes.
Sigon usab ni Lanao del Sur Assistant Majority Leader Zia Alonto Adiong nga kinahanglang humanon na ang nasampit nga issue gumikan wala matud pa’y kamatuoran.
