Gikondena ni Bise Presidente Sara Duterte ang desisyon sa gobyerno sa Pilipinas nga makigtambayayong sa International Criminal Court (ICC) nga adunay kalabutan sa kaso nga giatubang sa iyahang amahan nga si kanhi Pangulong Rodrigo Duterte.
Sa usa ka pamahayag samtang anaa siya karon sa The Hague, Netherlands aron bisitahon ang iyang amahan nga temporaryong nahimutang sa detention facility sa ICC, giingon sa Bise Presidente nga unta angay hatagan og prayoridad sa gobyerno ang kahimtang sa mga Pilipinong naipit sa mga kagubot sa Israel ug Iran.
Iyang giingon nga makalilisang ug makapasubo nga gamiton pa sa administrasyon ang kuwarta sa katawhan aron suportahan ang mga testigo batok sa iyang amahan, imbis nga gamiton kini sa pagtabang sa mga Pilipinong nagkinahanglan og panalipod ug tabang sa tunga sa tensyon sa mga nasod sa Middle East.
Mipasangil usab siya nga ang kasamtangang administrasyon mas gipanguna ang politika ug pagpangdaot inay sa tinuod nga serbisyo sa katawhan.
Apan sa laing bahin, giklaro na sa Malacañang nga ang tabang nga gihatag sa gobyerno sa mga testigo nga nalambigit sa kaso batok sa kanhing Presidente sa ICC dili direktang pakigtambayayong sa international tribunal, kondili usa lamang kini ka porma sa pagtabang sa matag Pilipino nga nanginahanglan og suporta ug proteksyon.
