Nakuhaan man, mas dako pa gihapon kuno ang budget sa opisina ni Vice President Sara Duterte kung ikumpara sa budget nga gihatag sa administrasyong Duterte sa gipulihan niini nga si Leni Robredo.
Gipahayag ni Senior Deputy Speaker ug Pampanga Rep. Aurelio Gonzales, Jr. sa pagmugna sa sugyot nga 2025 budget ug gipahinumduman ni Speaker Ferdinand Martin Romualdez ang mga kaubanan niining kongresista sa ka-importante nga matubag sa Office of the Vice President (OVP) ang mandato niini.
Matod pa sa magbabalaod, karong tuiga ang OVP ang adunay P1.874 bilyong pondo ug niadtong 2023 ang aduna kini P2.344 bilyon.
Sa mosunod nga tuig, ang OVP gigahinan ug mukabat sa P733 milyong budget. Niadtong 2017, ang buhatan ni Robredo ang nakakuha ug P428.6 milyong budget.
Niadtong 2018 nakakuha usab kini ug P543.9 milyon; P663.4 milyon niadtong 2019; P699.9 milyon niadtong 2020; P900 milyon niadtong 2021 ug P702 milyon niadtong 2022.
