Gikonsiderang political harassment ni Vice President Sara Duterte ang gikanayon sa Kanhi Customs Intelligence Official nga si Jimmy Guban gumikan sa pagkalambigit sa iyang igsuon nga si Representative Paolo Duterte ug bana niining si Atty. Manases Carpio sa illegal nga droga.
Sumala pa ni VP Sara Duterte, nga kahibulongan kaayo ang maong paggawas sa maong alegasyon hilabi pa nga bag-ohay lamang sab kining niluwat og pamahayag alang sa iyang kasinatian ug namatikdan sa nasud.
Apan bisan paman niini, gipasalig sa opisyal ang padayong paghatod og maayong serbisyo sa katawhan uban sa panghinaot nga dili dayong magpadala sa kasaba sa politika ang katawhang pilipino sanglit mas daghang butang karon ang angay tagaan og pagtagad susama na lamang sa padayong pagtaas sa presyo sa mga palaliton ug uban pa.
Hinoon, pagpaklaro sa bise nga nakigsabot na kini sa iyang bana nga dili mohatag og tubang sa mga pangutana nga wala nalambigit ang ilang pangalan aron dili na kini makatampo pa sa mga isyu ug kainit sa sitwasyon sa politika karong panahona.
