DAVAO CITY – Magpadayon karong adlawa ang Voter’s Registration alang sa 2022 National and Local Elections sa mga buhatan sa Commission on Elections dinhi sa Davao Region.
Temporaryo usa kining nahunong gumikan sa filing sa Certificate of Candidacy niadtong Oktubre 1 hangtod 8.
Karon usab ang unang adlaw sa extended voter’s registration, human nga gitugutan sa COMELEC ang pagpalugway niini, subay na usab sa panawagan sa mga magbabalaod ug sa publiko.
Abli ang COMELEC offices Lunes hangtod Biyernes, alas 8 sa buntag hangtod alas 5 sa hapon. Dili usab abli sa weekends ang COMELEC, gawas na lamanag sa katapusang adlaw sa extended registration sa Oktubre 30, nga matunong sa adlawng Sabado.
Subling nagpahimangno ang COMELEC ngadto sa publiko nga dili na hulaton ang ulahing adlaw sa gilugwayan nang voter’s registration aron dili subling mahitabo ang kapin siento metros nga pila sa buhatan sa COMELEC Davao City, nga milapas pa sa Magsaysay Fruit Vendors Association ug sa entrada sa Sta. Ana Wharf, pipila ka adlaw ayha ang orihinal nga deadline nga Setyembre 30.
