Gipagawas na sa Department of the Interior and Local Government (DILG), pinaagi ni Secretary Jonvic Remulla, ang pormal nga direktiba alang kang Davao City Vice Mayor Sebastian “Baste” Duterte nga siya una ang molingkod nga Acting Mayor sa siyudad.
Kini nga lakang mahitungod sa temporaryong legal nga kawalay kapasidad ni kanhi Pang. Rodrigo Roa Duterte (FPRRD), human nga makadaog pagka-Mayor.
Ang mando sa DILG gibase sa Seksyon 46(a) sa Local Government Code, nga nagtugot nga sa kaso sa temporaryong kawalay kapasidad, pisikal man o legal, awtomatikong motuman sa katungdanan ug gahum sa mayor ang bise mayor.
Sa samang paagi, gibase sa Administrative Order No. 15, series of 2018, gimanduan usab sa DILG nga ang 1st Ranked Sangguniang Panlungsod Member nga si Rodrigo Duterte II maoy magsilbing Acting Vice Mayor sa dakbayan sa Davao.
Kini nga administrative order nagtudlo sa lagda sa temporaryo nga pagpuli sa mga bakanteng lokal nga elective positions.
Gibutyag usab sa DILG nga legal ug gikinahanglan ang ilang aksyon aron masiguro ang padayon nga liderato ug serbisyo sa syudad taliwala sa nagapadayon nga legal nga proseso batok sa kanhi Pangulo atubangan sa International Criminal Court (ICC).
