Gikumpirma sa National Bureau of Investigation (NBI) nga nagtugma ang viral dashcam footage sa Kennon Road, Benguet sa initial findings sa pagkamatay ni former Department of Public Works and Highways (DPWH) Undersecretary Catalina Cabral kaniadtong Disyembre 18.
Sumala sa mga otoridad, makita sa video si Cabral nga nakalingkod sa kalsada sa wala pa siya namatay, ug napamatud-an usab sa Philippine National Police (PNP) ug sa Department of the Interior and Local Government (DILG) Secretary Jonvic Remulla nga tinuod ang selfie photo sa driver ni Cabral ug nagtugma sa tawong naa sa video.
Gipahibalo ni PNP acting chief Police Lt. Gen. Jose Melencio Nartatez Jr. nga klaro ang pagkakilanlan sa patay’ng lawas ni Cabral, ug nakatutok na ang PNP sa pag-imbestiga aron masuta ang tinuod nga nahitabo sa kanhi DPWH official.
Padayon usab ang kooperasyon sa PNP sa NBI sa pagkuha sa ebidensya nga may kalabotan sa anomalya sa flood control projects diin nalambigit si Cabral. Gipahigayon ang crime scene reconstruction sa Kennon Road, samtang gisusi usab ang hotel room sa biktima aron makompiska ang iyang personal nga gamit ug dokumento nga posibleng makatabang sa imbestigasyon.
Sa pagkakaron, ang patay’ng lawas ni Cabral nagpabilin sa memorial chapel sa Quezon City samtang nagpadayon ang mga imbestigador sa pagtipon sa kompletong impormasyon sa kaso.
