DAVAO CITY – Anaa na karon sa kustodiya sa otoridad ang vintage bomb nga nakubkuban sa construction site sa Marfori Subdivision ning dakbayan.
Una ng nasayran kang Barangay 9-A Poblacion Brgy. Capt. Tata Llubit nga wala gilayon gipahibalo sa contractor nga adunay nadiskobrehan nga vintage bomb sa lugar gumikan sa kabalaka nga masayran nga walay building permit ang ilang gihimo nga contruction sa subdivision.
Gani, ang laing pa nga mga residente nga duol sa lugar ang nagpahibalo sa otoridad kalabot sa gitipigan nga vintage bomb hinungdan nga ila kining gipanubayan ug nasayran nga gitagoan kini sa ilalom sa abohan sa construction site.
Nakiglambigit ang mga residente duol sa lugar ngadto sa otoridad gumikan sa kahadlok nga mobusikad kini ug mabutang sa risgo ang ilang kinabuhi. Mismong si Kapitan Llubit ug ang mga elemento sa City Ordnance Disposal Unit sa Davao City Police Office ang mikuha sa bomba nga delikado pa nga mobusikad.
Gikatakda na sab nga pasakahan ug reklamo sa barangay council ang contractor human nga wala niini gipahibalo ang nakubkoban nga bomba.
