Pormal nang sirad-an sa Disyembre 2025 ang Victoria Plaza, ang unang mall sa Davao City nga nahimong timaan sa kalambuan sa komersyo ug kultura sulod sa kapin tulo ka dekada. Ang mall nga giila isip “unang shopping landmark” sa syudad, maoy giatangan sa daghang Dabawenyo sa mga katuigan.
Sa unang kwarter sa 2026, magsugod na ang NCCC isip operator, kauban ang mga tenants, sa pagpanghipos sa mga gamit ug pagtangtang sa materyales aron andamon ang lugar alang sa demolisyon, ilabi na sa likod nga parte sa parking area. Kini nagtimaan sa katapusan sa usa ka panahon sa kasaysayan sa siyudad.
Subay pa sa kasaysayan, ang Victoria Plaza abli niadtong Marso 16, 1993 ug nahimong duyan sa dagkong konsiyerto, pista sa komunidad, ug paboritong tambayan sa mga pamilya ug kabatan-onan sa wala pa mosikat ang digital nga panahon. Bisan wala pay klaro nga plano kung unsa ang ipuli sa lugar, gituohan nga usa kini ka dako nga development project nga mahimong maghatag og bag-ong dagan sa ekonomiya ug turismo sa Davao City.
