DAVAO CITY – Nagpadayag sa iyang dakong pagpasalamat si Davao City Vice Mayor Paulo Duterte sa mga mihatag ug suporta sa bag-ohay pa lamang nga natapos nga 32nd Kadayawan Davao 2017.
Mapalasamaton sab ang bise Mayor sa mga turista ingon man sa mga bisita nga wala nagpakita ug kalisang luyo sa deklarasyon sa Martial Law.
Si Vice Mayor Paulo Duterte maoy nag-preside sa gipahigayon nga session sa konseho kagahapong adlawa apan wala na kini mihatag ug kahigayonan nga makahinabi sa mga sakop sa media sanglit dili niya buot nga sukit-sukiton pa kalabot sa pagduhig sa iyang pangalan sa kontrobersiya nga gikalambigit sa ahensiya sa Bureau of Customs (BOC) may kalabutan sa pagpayuhot ug ginadili nga droga.
Sumala ni Pulong mohatag lamang siya ug pahayag sa City Information Office (CIO) kung aduna man siya’y ibutyag kalabot sa maong isyu.
Kahinumduman nga wala nakita publiko ang bise Mayor atol sa selebrasyon sa Kadayawan.
