DAVAO CITY – Vessel owner sa Sasa Wharf nagpakitabang sa City Transport and Traffic Management Office (CTTMO). Gumikan kay peak season, labi na nga umaabot ang Semana Santa hinongdan nga daan na nga gikabalak-an ang pagdagsa sa bagang panon sa katawhan, labi na mga langyaw nga motabok ngadto sa Island Garden City of Samal (IGACOS).
Gipangandaman nang daan sa kadumalahan sa mga vessel ang bagang panon sa katawhan ug mga sakyanan sa pantalan.
Karon pa lamang daan nakiglambigit na ang kadumalahan ngadto sa CTTMO aron nga mopadala ug mga personahe niini aron nga mamahimong hapsay ang bahin sa kadalanan nga das-agan sa mga sakyanan.
Tumong niini nga dili matanggong ang uban pa nga mga motorist.
Gipanghinaut sa kompanya sa mga vessel nga makabiyahe ang upat nila ka mga sakyanang pandagat aron nga dali ra ang pagpatabok sa mga turista.
Gilauman nga doble kun dili man triple ang pagdagsa sa mga pasahero sa mga barge padulong sa Samal.
Nasayran nga ang Philippine Coastguard mipahimutang sab ug passenger assistance center sa mga nagkada-iya nga mga pantalan sa dakbayan sama sa Sta. Ana ug Sasa aron nga maseguro nga wala’y malalusot nga mga gidili nga mga butang ug alang sab sa seguridad sa mga pasahero nga motabok ug pabalik gikan sa IGACOS.
