DAVAO CITY – Gilauman nga mukabat sa says-sientos ka mga vendors sulod sa San Pedro Square ang maapektuhan sa pagpapahawa kanila sa umaabot nga pagpanumpa ni incoming vice president Sara Duterte Carpio, karong adlaw nga dominggo petsa 19 ning bulan sa Hunyo ning kasamtangan.
Hinoon, nahimong malinawon ang pakigdayalogo sa buhatan sa mga vendors ug gipasalig nga mamahimo gihapon silang magpadayon sa ilang pagpamaligya sa maong area human sa oath-taking ni Vice President Inday.
Gihangyo ang mga vendors sa San Pedro Street partikular na kadtong mga nahimutang sa Bolton Street nga likayan una ang pagbaligya sa ilang mga produkto sa adlaw nga Sabado, Hunyo 18, ug adlaw nga Domingo, Hunyo 19, aron nga mahatagan og dalan ang gikatakdang Oath-taking ceremony ni Vice President-elect Inday Sara Duterte Carpio.
Apan gumikan niini, nakadawat og reklamo ang buhatan sa Auxiliary Services Unit (ASU) gikan sa mga vendors nga gikatahong mibalibad sa temporaryong pag suspende sa ilang pagpamaligya sa maong mga adlaw gumikan kay mawad-an na sila sa ilahang panginabuhi-an sulod sa duha ka adlaw.
Mihimo sa pakighinabi ang ASU ngadto sa mga vendors sa San Pedro Square niadtong milabay nga adlaw sa Osmeña Park. Giklaro usab ni Paul Bermejo, Hepe sa Auxiliary Services Unit, ngadto sa mga vendors nga wala ginabawalan nga maninda ang mga nahisgutan.
Apan kadtong anaa nahimutang doul sa stage, ilabi na ang mga mamaligyaay nga anaa dapit sa Unitop ug Banco Filipino mao ang temporaryo lamang nga ipasara hangtud mahuman ang oath-taking ni VP-elect Inday Sara. Dugang pagpaklaro usab ni Bermejo ngadto sa mga vendors nga mamahimo sila nga mubalhin sa ubang area.
Usa sa rason sa temporaryong pagpahunong sa mga aktibidad sa mga vendors dapit sa San Pedro Square mao ang pagsiguro sa seguridad ug lauman usab ang maong event nga tambungan sa gibana-banaang mukabat sa 25,000 ka mga tawo nga nagagikan pa sa nagkadaiyang bahin sa nasud.
