Giawhag sa usa ka myembro sa Sangguniang Panlungsod (SP) ang mga Dabawenyo nga isumbong dayon sa otoridad ang mga indibidwal nga maguba o mag-vandalize sa mga pampublikong kabtangan, taliwala sa mga report sa vandalism sa Davao City Interim Bus System (DC Bus) nga mga bus stop ug mga signage.
Matod ni Councilor Jessica Bonguyan, Chairperson sa Committee on Public Works and Highways, ang vandalism dili lamang simpleng pagdaot sa kabtangan, kundili usa kini ka repleksyon sa unsaon paghatag bili sa katawhan sa mga butang nga gitukod alang sa tanan.
Gipahinumduman ni Bonguyan nga subay sa Davao City Ordinance No. 033268, series of 1968, ginadili ang pagdaut, pagsulat, pag-ukit, o pagbutang og graffiti sa mga bungbong, pampublikong istruktura, ug bakod nga makita sa publiko, ug adunay silot ang mosupak niini.
Matod pa sa konsehal, ang pagdaot sa mga pasilidad sama sa DC Bus nagapakunhod sa kaayohan sa proyekto nga gituyo aron maghatag og luwas ug libre nga transportasyon sa mga komyuter.
Ang mga bus stop ug signage importante alang sa kaayusan ug kalihokan sa siyudad, ug ang pagdaot niini makapahinay sa kauswagan ug makasamok sa publiko.
Dugang pa niya, ang mga nadaot nga signage ug pasilidad dili lamang makadaot sa dagway sa siyudad, kundili makapaluya usab sa paningkamot sa mga nagtrabaho aron mapaayo ang kadalanan, transportasyon, ug mga pampublikong luna.
Giawhag ni Bonguyan ang tanan nga respeto-on ang mga shared spaces, panalipdan ang mga imprastruktura alang sa pamilya ug komunidad, ug ipasumbong ang vandalism pinaagi sa Davao City Reports hotline aron mapadali ang pagpatuman sa balaod, mapalig-on ang kaayusan, ug masuportahan ang malungtarong kalamboan.
