DAVAO CITY – Giyagyag sa Land Transportation Franchising and Regulatory Board (LTFRB) nga wala na makatamod sa tukma nga mga termino ug sumbanan ang biyahe sa mga UVExpress Van.
Kini ang nasayran atol sa consultation meeting uban sa mga UVExpress Van Operators, diin gitataw ni LTFRB Chairman Martin Delgra nga gi-desenyo ang mga passenger van isip komplimento sa PUJ mao nga dili kini angayan nga mosulod sa rota sa mga bus.
Sumala pa kang Delgra nga nakigkompetisya sab ang UV van sa mga bus gumikan kay naga-pick-up sab kini ug mga pasahero sa mga bus.
Sumala pa kang Delgra nga subay sa tukma nga sumbanan sa transportasyon, ang bus ang dunay katungod sa pagbihae sa lagyo nga mga dapit, gumikan kay makahatud kini ug daghanan nga mga pasahero.
Bisan pa niini gipasalig gihapon sa LTFRB ngadto sa mga UVExpress Van Operators ug drivers nga dili sila mawad-an ug panginabuhi-an gumikan kay dunay mugna-on nga local public transport route plan.
Hinoon mag-agad ang maong rota sa LGU kung unsa nga bahin sa ilang dapit ang nagkinahanglan ug serbisyo sa mga van.
Gipahigayon ang consultative meeting tali sa LTFRB, passenger van operators aron nga dili na masubli ang aksidente nga nakapatay ug dose ka mga tawo, diin unse kanila mga pasahero sa UVExpress Van.
