Misaka na sa P17.27 trilyon ang utang sa Pilipinas, kana subay sa labing bag-ong datos nga gipagawas sa Department of Finance (DOF).
Nagpadayon ang pagsaka sa utang sa nasud tungod sa mga panginahanglanon sa galastuhan sa gobyerno, hilabi na sa mga programa nga gitumong sa pagpalig-on sa ekonomiya ug pagtabang matud pa sa katawhan.
Gibutyag nga og ibahin ang utang sa matag Pilipino, mugawas nga ang matag usa adunay utang nga P153,000.
Kini base sa estimate nga kapin 112 milyones ang populasyon sa Pilipinas karong tuiga.
Gipahayag ni Finance Secretary Ralph Recto nga ang pangutang gihimo aron masuportahan ang kalambuan sa ekonomiya sa nasud.
Gibutyag usab niya nga ang mga kwarta nga nakuha pinaagi sa pangutang ginagahin sa dagkong proyekto sama sa imprastruktura, edukasyon, agriculture, panglawas, ug serbisyo publiko.
Gipasabot sa DOF nga dili kini sayon nga desisyon, apan gikinahanglan kini aron nga masustentohan ang mga essential nga programa sa gobyerno, labi na atol sa panahon nga daghan pang mga Pilipino ang nagkinahanglan og suporta.
Gipasalig sa kagamhanan nga bisan pa sa kadak-on sa utang, gipadagan gihapon kini sa responsable nga pamaagi ug anaa gihapon sa luwas nga lebel, subay sa mga pamatasan nga giila sa internasyonal.
Gitinguha usab sa economic managers nga mapakunhod pa ang debt-to-GDP ratio sa umalabot nga mga tuig, nga karon anaa na sa 62% ug target nga mukunhod pa kini sa 60% sa tuig 2025 ug 56% sa 2028.
Gipaklaro sab sa Palasyo nga ang pagpangutang usa ka pamaagi aron masiguro ang long-term development sa nasud.
