Gipagawas sa National Bureau of Investigation (NBI) ang bag-ong dash cam footage nga gituohang naglangkob sa katapusang mga gutlo sa kinabuhi sa kanhi Department of Public Works and Highways (DPWH) Undersecretary nga si Catalina Cabral.
Ang maong footage adunay petsang Disyembre 18, 2025, ang adlaw nga namatay ang kanhi opisyal.
Kuha kini gikan alas-3:25 sa hapon hangtod alas-3:26 sa hapon.
Makita sa bag-ong footage ang usa ka babaye nga naglingkod sa kilid sa kalsada, taliwala sa mga concrete barrier, nga diretso nag-atubang sa usa ka lawom nga pangpang.
Sa timestamp nga 15:25:37, makita ang naglingkod nga babaye sa kilid sa kalsada nga gituohang si Cabral, tungod kay nagtugma ang iyang gisul-ob sa katapusang sinina nga gisul-ob sa kanhi opisyal.
Una nang nagpagawas ang mga otoridad og CCTV footage gikan sa Ion Hotel, diin temporaryong misaka si Cabral ug ang iyang drayber niadtong adlawa. Sa maong video, makita nga migawas ang duha gikan sa ilang kwarto human sa alas-2 sa hapon.
Kung ibalik ang naunang pahayag sa drayber ni Cabral nga si Ricardo Muñoz Hernandez, tali sa alas-2 hangtod alas-3 sa hapon niya gibilin ang kanhi opisyal sa Kennon Road, Sitio Maramal, Camp 5, Barangay Camp 4, sa lungsod sa Tuba, Benguet.
Nahitabo kini, matod pa niya, human silang migikan sa Ion Hotel sa Baguio City.
