DAVAO CITY – Laoman nga dad-on sab sa Tagum City ang usa pa ka utok sa halapad nga investment scam sa nahisgutan nga dapit diin daghanang mga indibidwal ang nanga-ilad ug milyon ka peso ang wala na nabalik.
Kahinumduman nga malampuson nga nasikop sa mga personahe sa National Bureau of Investigation Laguna District Office ang giilang top executive sa Rigen Marketing nga maoy mipaluyo sa pyramiding ug investment scam nga nakabase sa Tagum City.
Naila ang dinakpan nga si Kharl Dexter Auditor kinsa nagtago tago human milayas dala ang minilyon nga salapi nga gi-invest sa mga biktima sa ilang kompanya.
Nadakpan sa otoridad ang nahisgutan nga nagtago-tago sa San Pablo, Laguna.
Human nasayran ni Atty. Danilo Daganzo ang hepe sa NBI Laguna DIstrict Office ang inpormasyon, gilusad gilayon ang operasyon sa pag-aresto kang Auditor.
Nasayran nga nag-atubang kini ug kasong large scale estafa sa RTC Branch 2 sa Regional Trial Court sa Tagum City. Una na sab nga nahukmang guilty ang igsuon niini nga si King Paul Bryan Auditor niadtong Enero 21, 2021 sa susamang kaso ug gimanduan nga bayaran ang mga complainant nga mobalor sa 8.4 milion pesos.
Samtang ang ilang kasosyo nga si Rico John Garcia nga nadakpan sa Paranaque niadto Marso 2020 ug kasamtangan karong gibilanggo sa Tagum City Jail ug gipaabot nga hukman sa korte sa kasong gi-atubang.
Padayon pa sab nga gipangita karon sa otoridad ang ilang kauban nga si Romen Samuel Wabina.
