DAVAO CITY – Gumikan sa pag-ulan nga nasinatian ning nakalabay’ng duha ka adlaw, napanas ang bukiron nga basin sa Barangay Don Salvador Lopez, City of Mati, Davao Oriental.
Subay sa report sa Mati CIO, pasado alas 11 kaganinang buntag dihang nidahili ang yuta sa Purok Sangay sa nahisgutang Barangay.
Gumikan sa landslide, isolated karon ang 7 ka purok nga gilangkuban sa Prk. Upper Cangusan, Prk. Lower Cangusan, Prk. Proper Cangusan, Prk. Tabon- tabon, Prk. New Camotes, Prk. Sta. Cruz ug Prk. Biasong sakop sa Brgy. Don Salvador Lopez.
Padayon usab nga gikumpirma sa Mati City Disaster Risk Reduction Management Office ang report sa mga residente nga dunay upat katawo ang natabunan, kinsa mag pamilya matod pa nga sakay sa motorsiklo kinsa nilabang sa maong dapit ug usa ka residente nga namingwit sa creek.
Pasado alas 5:38 sa hapon dihang gisugdan sa otoridad ang search and rescue operation ug pagka alas 6:04 sa gabie narekober ang wala pa nailhang patay’ng lawas sa usa ka lalaki. Sa karon temporaryo usa nga gisuspendi ang retrieval operation ug gikatakda kining ipadayon ugma sa alas 7 sa buntag.
