Nahaybol ug nasunog ang usa ka Wingvan truck pasado alas Dos ang takna kaganihang kaadlawon.
Subay sa report sa mga kapulisan, nahitabo ang insidente sa Sitio Pagan Grande, Barangay Tamugan, Marilog District, ning dakbayan sa Davao kaganihang kaadlawon.
Subay sa gihimong imbistigasyon sa kapulisan, nakasinati sumala pa og problema sa preno ang Wing Van nga gimaneho ni AJ Lamatan, 26-anyos.
Sumala pa sa nahisgutan nga samtang naglawig kini sa karsada sa nasampit nga lugar kalit sumala pa nga nawad-an og preno ang gimaneho niini nga sakyanan nga miresulta sa pagkadisgrasya tungod dili na niini makontrola ang manobela.
Samtang nakamugna usab og sunog atol sa maong panghitabo gumikan gidakop sa kalayo ang nag leak nga gas hinungdan nga misilaob ang sakyanan hangtod nga naugdaw.
Narespondehan pa ang maong panghitabo sa mga kabomberohan apan paspas nga miulbo ang kalayo.
Gumikan sa maong panghitabo nakaangkon og minor injuries ang driver nga karon anaa na sa luwas nga kahimtang.
Nasayran nga adunay karga nga ilimnong makahubog ang nasampit nga truck.
Padayon usab ang gihimong imbistigasyon sa kapulisan aron masuta ang tinuod nga hinungdan sa disgrasya.
