DAVAO CITY – Naglusad ug usa ka joint buy-bust operations ang mga sakop sa Talomo Police Station uban ang Philippine Drug Enforcement Agency Regional Office 11, RMFB 11 ug San Pedro Police Station kagahapon sa hapon sa may Barangay 9-A F. Torres Street, Barrio Tubigon, siyudad sa Davao; nga gikamatyan sa usa ka suspek.
Sumala sa imbestigasyon, misuway ug sukol sa mga otoridad ug sa dihang ilang napatay ang suspek nga si Hideki Hernando alyas Diki, hamtong ug residente sa maong dapit.
Gisulayan pa ug tabang sa ospital si alyas Diki apan gideklara nang dead on arrival. Nadakpan sab ang iyang mga kaubanan nga sila Hezekieh Lim, 24 anyos, usa ka call center agent; ug Kit Brian June Valenzona, alyas “KB”, manager sa usa ka call center company sa dakbayan.
Na-rekober gikan sa mga suspek ang usa ka punto treyntay otso nga revolver ug punto kwarentay singko nga pistola, walo ka bloke sa gituuhang pinaugang dahon sa marijuana ug siyam ka pakete sa gituuhang shabu nga nagkantidad og kapin P156,000.
Gibalhug na karon sa selda ang mga nahibiling suspek nga mag-atubang ug mga kasong paglapas sa Republic Act 9165 kon Comprehensive Dangerous Drugs Act of 2002 ug Republic Act 10591 kon Illegal Possession Of Firearms And Ammunitions.
