DAVAO CITY – Nagsaulog ang Davao City sa National Disability Prevention and Rehabilitation Week gikan Hulyo 17 hangtod 23.
Tungod niini, nagtumong ang Person with Disability Affairs Office (PDAO) ubos sa City Social Welfare Development Office (CSWDO) sa paghatag ug gahom sa mga differently-abled nga mga tawo pinaagi sa pag-awhag kanila sa pag-apil sa community-building activities.
Ang selebrasyon magpakita sa kahanas ug talento sa mga persons with disabilities (PWDs) sa dakbayan.
Dungan sa selebrasyon ang adlawng natawhan sa bayani nga si Apolinario Mabini, kinsa nahimong baldado tungod sa sakit nga polio.
Magsugod ang kalihokan pinaagi sa fellowship gathering sa San Pedro Social Hall karong Hulyo 17, nga sundan sa art contest sa Tambayan Center for Children’s Rights sa Matina karong Hulyo 18.
Usa ka Paralympic tournament ang ipahigayon sa Bago Gallera Gym karong Hulyo 19, nga sundan sa Sayawan at Awitan Talent Show ug Health and Wellness Caravan sa SM City Annex karong Hulyo 20.
Ipahigayon sab ang usa ka leadership training alang sa PWD public personnel karong Hulyo 21, ug usa ka libreng legal aid caravan nga nagtutok sa PWD rights and suffrage sa Tambayan Center karong Hulyo 22.
Matapos ang selebrasyon sa usa ka fellowship activity sa Tambayan Center karong Hulyo 23.
Abli sab sa alang sa tanang katawhan sa dakbayan ang pagsaulog sa NDPR Week dinhi sa Davao City.
via || Bombo LJF
