Milagro nga naluwas sa usa ka security guard sa Makati City ang iyang kaugalingon ug ang establisyemento nga iyang ginabantayan, human nga gisuklan niini ang lima ka mga suspetsado nga buot mangholdap sa sulod sa nahisgutang tindahan, niadtong nakalabay nga semana.
Sumala pa sa kuha sa CCTV, makita nga misulod kalit ang mga suspetsado ug galaroy-laroy sa sulod sa maong tindahan, nga sumala pa ginapangita kuno matod pa nila ang vault nga diin didto usab ginabutang ang mga halin sa maong establesyemento.
Apan, sa dihang nakakuha ug tiyempo ang security guard nga suklan ang lima ka mga kriminal, dali kining mibunlot sa iyang pistola, ug aktohan kining gipabut-han ang mga suspetsado nga maoy hinungdan nga na-igo sa likod nga bahin sa lawas ug nakabsan sa kinabuhi ang usa ka holdaper nga ginganlang si Jeric Brudjal nga nahibal an usab nga usa kini ka leader sa Brudjal Criminal Group ug adunay warrant of arrest sa kasong frustrated murder, robbery ug carnapping.
Samtang ang laing upat ka mga kaubanan niini, dali nga miiskapo sa maong panghitabo. Apan pagka-ugma nadakpan ra sab gilayon ang usa lamang ka kauban niini.
Sa karun padayon pa gihapon nga nagapahigayon ug hot pursuit operation ang Makati City Police ngadto sa mga tulo nga nakasibat nga mga kriminal.
Samtang gitagaan usab ug award ug pahalipay sa kapulisan ang security guard isip simbolo sa iyang pagka-maisugon nga gi batokan ang lima ka mga suspetsado.
Gidayeg usab kini sa kadaghanan, gumikan usa lamang kini ka talagsaong panghitabo nga diin ang nag-inusarang security guard adunay kaisug nga mu batok sa lima ka mga kawatan.
