DAVAO CITY – Nakahinabi sa Bombo Radyo Davao ang usa sa mga kababayan nga kasamtangang naipit sa nahitabong gubat sa nasud Sudan.
Gibutyag ni Bombo International Correspondent Jumar Camanzo Gingo, usa ka car factory worker nga nagtrabaho sa mismong sentro sa giyera nga kabisera sa Khartoum.
Sumala sa pagsaysay ni Jumar, nagpahinabo gihapon ang gubat tali militar ug paramilitary unit sa maong nasud diin iyang gikumpirma nga usa ka Pinoy ang gikatalang nagpaalim sa ospital human kini napusilan sa mga armado samtang misulay og sulod sa warzone sa Khartoum.
Gibutyag sab ni Jumar nga nakasinati na ang atong mga kababayan ug tumang kahadlok ug kabalaka gumikan sa ubay-ubay nga pagbinayloay og bala ingon man ang pagkaguba sa mga balay sa lugar.
Sumala pa, nagsugod ang mga panagbanggi tali gobyerno ug rebelde gumikan sa pagmaggahi sa nihulip nga si General Mohamed Hamdan Dagalo, ang nanguna sa paramilitar nga Rapid Support Forces, nga muhawa na sa pwesto bisan pa sa paghangyo nga ginahimo sa heneral sa Sudanese army na si General Abdel Fattah al-Burhan nunot sa gihatag niining palugit sa pagpangatungdanan ni Dagalo.
Gumikan sa tensyon sa pagbugal-bugal sa kasabutan tali sa duha ka heneral, namugna ang tensyon nga nagpahapa karon sa nasud Sudan.
Ning kasamtangan, nagpadayon gihapon ang gubat sa maong nasud diin apektado niini ang nasa 200 ka mga Pilipinong nagtrabaho.
Apektado sab ang pagkaon, tubig, lakip na kuryente sa ilang gikahimutangan. Nagdungag sab sa ilang kabalaka ang posibleng paglusong sa mga armado kanila.
Hinuon, andam na ang atong mga kababayan sa repatriation sa embahada sa Cairo, Egypt. Apan ilang gikabalak-an ang mamahimong paghikling gumikan sa limitadong mga dalan ug sakyanan.
Gipanawagan karon ni Jumar ug sa iyang mga kaubanan sa Sudan ngadto sa gobyerno ang mga hinabang nga gikinahanglan aron luwas silang makauli sa Pilipinas.
via || Bombo LJF
