DAVAO CITY – Nakapabulabog sa mga residente ang naglisbo nga baho sa patayng lawas sa usa ka lalaki nga napalgan sa usa ka menteryo sa Purok 7, Kawayanan, Brgy 8-A, Davao City.
Pagbutyag sa saksi nga giilang si Zaldy Birondo Madamba, samtang nilabay kini sa may Roman Catholic Cemetery sa maong dapit bandang alas-9:30 kagahapon sa buntag, dihang nasuta nga duna nay nadugta nga patayng lawas ibabaw sa panchon.
Nagpatabang kini sa mga sakop sa Central 911 aron i-retrieve ang patayng lawas. Giila dayon ang patayng lawas nga si Christopher John Gonzales Reuyan, 16 anyos nga taga- Purok 8, M.I.H., Brgy 8-A, ning dakbayan.
Sumala sa amahan nga si Jomar Tupaz Reuyan, taxi driver, nga wala na nakaplagan pa ang iyang anak sukad niadtong Disyembre 17 sa buntag.
Pagbutyag sa usa sa mga higala ni Christopher John nga Disyembre 16 pa dihang ulahi nilang nakauban ang biktima nga nangaon sa Bulaloan sa Bankerohan, ug dungan pa silang nanguli bandang alas-11 sa gabii.
Ginahulat pa ang desisyon sa amahan kon ipailawom sa autopsy ang nadugta nga lawas sa anak.
