DAVAO CITY – Dungan sa pag-abli sa kasaulogan sa 37th Kadayawan Festival, nag-awhag karon ang Davao City Police Office (DCPO) sa tanang mga dabawenyo, mga bisita ingon man sa mga langyaw nga turista nga kanunay timan-an ang mga pahimangno ug pahinumdom alang sa luwas nga kasaulogan sa kapiyestahan.
Gumikan sa dili malikayang kainit sa panahon, nagpahimangno ang buhatan sa publiko nga mahinungdanong magdala og kalo ug pamaypay sa higayon nga mulaag. Kanunay nga mangita sab og landong nga kapasilongan ingon man magdala og candies o dili ba kaha biscuit ug extra nga T-shirt. Nagpahimangno usab ang buhatan nga siguroong magdala og tubig nga anaa sa transparent nga sudlanan.
Dili usab magpataka og tabok ug kanunay gamiton ang mga pedestrian crossing lanes. Gidili usab ang pagpalupad og drones gawas na lamang sa mga indibidwal nga nakakuha og security clearance. Hugot usab nga ginadili ang pagpanigarilyo sa mga pampublikong lugar.
Mas maayo sab matud pa nga likayan ang pagdala og mga masuso ug gagmay’ng bata sa selebrasyon. Bawal sab ang pagdala og Backpacks ug mga dagkong bags ingon man ang pagsul-ob og Jackets ug sunglasses. Hugot sab nga ginadili ang pag-dala ug pag-inom og ilimnong makahubog ug labaw sa tanan bawal ang bomb jokes, pagdala ug armas ug mga hait nga butang o hinagiban.
