DAVAO CITY – Naligo sa kaugalingong dugo ang usa ka lalaki human nga gitigbas kini kagahapong adlawa sa Abarca St., Brgy. Poblacion, lungsod sa Cateel, Davao Oriental.
Giila ang maong biktima nga si Alex Villaruz Lim, 50 anyos, byudo, usa ka mag-uuma ug residente sa Brgy. Poblacion Cateel sa nahisgutang probinsya. Samtang ang nanigbas usab ang giilang si Seias Linaza Lasquite, 57 anyos, minyo, usa ka mag-uuma ug lumulupyo sa Brgy. San Antonio-Cateel.
Subay sa gihimong imbestigayon sa kapulisan sa Cateel, nasayran nga nakit-an ang biktima kagahapong adlawa, alas 4:30 sa hapon kauban ang usa ka Arlene Aguilon Lasquite, 50 anyos, minyo ug residente sa Brgy. SanAntonio-Cateel. Matud pa nga nagmeryenda ang duruha sa Mix Venture Pastries Snack House apan wala madugay, miabot ang suspek nga si Seias Lasquite ug nahitabo ang usa ka init nga panaglalis tali sa mga nahisgutan. Sa kalit nga panghitabo, gihulbot ni Seias Lasquite ang gibitbit niining hinagiban ug walay kahadlok nga gitigbas ang biktima rason nga nahagba kini.
Human sa krimen, gilayon sab nga miikyas ang suspek lakip ang sundang niini samtang ang biktimang si Alex ang daling gidagan sa Davao Oriental Provincial Medical Center alang sa medikal nga interbensyon. Hinoon, ning kasamtangan, anaa na sa luwas nga kahimtang ang biktima. Sa pikas bahin, gilayon sab nga nadakpan si Seias sa bukiron nga bahin sa Brgy. Poblacion sa nahisgutang lungsod. Nakuha usab gikan sa iyang posisyon ang usa ka 17 pulgada nga sundang.
Balhug na karon sa prisohan ang suspek ug gihikay na ang kasong ipasaka batok niini. Subay sab sa imbestigasyon sa otoridad, nasayran nga kalagot ang hinungdan sa nahitabong pagpanigbas.
