DAVAO CITY – Patay ang usa ka lalaki human gipusil sa mga wala pa mailhing suspek sa Purok 9-B, Barangay Igangon, lungsod sa San Isidro, Davao Oriental.
Nailhan ang biktima nga si Bartolome S. Caso, 44 anyos ang pangidaron, ulitawo, usa ka motorcycle driver ug lumulupyo sa Purok 14, Barangay Kapatagan, lungsod sa Laak, Davao de Oro.
Subay sa gihimong inisyal nga imbestigasyon sa kapulisan, sakay ang biktima sa iyang orange nga motorsiklo nga nagasubay sa dala padulong sa Laak, Davao de Oro, sa dihang gitagbo kini sa duha ka tawo nga sakay sa color black nga motorsiklo nga wala usab plate number.
Sa way pagduha-duha, gipusil sa mga suspetsado ang biktima.
Nasiplatan sa crime scene ang basyo sa bala sa kalibre 45 nga pistola ug sling bag nga dunay mga personal nga kabtangan sa biktima.
Anaa karon ang patayng lawas sa biktima sa usa ka punerarya sa lungsod sa San Isidro, Davao del Norte, alang sa post-mortem examination.
Wala pa usab masuta ang motibo sa nahisgutang krimen.
