DAVAO CITY – Usa ka babayeng Hawksbill Turtle ang napalgang patay sa baybayon sa Purok Maribujoc, Dahican, Mati City, Davao Oriental kagahapion sa buntag.
Sumala sa Mati City Information Office, naplagan na lamang ni Poloy Palmera, usa ka myembro sa Mati Watersports Association, ang patayng lawas sa maong pawikan nga gibanabanang nasa 7 hangtud 8 anyos ang pangidaron.
Gituohang tulo ka adlaw nang namatay ang maong pawikan human sa pagka-trap sa pukot kon fish net apan nakit-an sab ang injury sa ulo sa maong mananap.
Gidala na sa Davao Oriental State University ang patay nga pawikan aron sutaon ang hinungdan sa kamatayon niini. Nahilakip ang Hawksbill Turtle sa mga “critically endangered” o hapit nang mawala nga ispisye sugod kaniadtong 1996, sumala sa International Union for Conservation of Nature.
