Nakakuha og atensyon ang usa ka dili makatuohang panghitabo atol sa konsyerto sa British nga banda nga Coldplay sa Boston niadtong Hulyo 16, human masakpan sa “kiss cam” ang pagginaksanay sa duha ka opisyal sa usa ka kompanya nga gikatahong naglambigit sa usa ka tinago nga relasyon.
Nailhan ang lalaki nga si Andy Byron, ang Chief Executive Officer sa kompanyang Astronomer, nga naggakos sa likod sa Chief Human Resources Officer nga si Kristin Cabot, nga nagkupot sab sa iyang mga kamot nga daw mga tinuod nga trato.
Sa dihang nakita sila sa dako nga screen, misulti ang lead vocalist nga si Chris Martin og, “Oh, look at these two.”
Dali dayon nga nakatabon si Cabot iyang nawong ug milikay sa kamera. Si Byron sab, milikay sab sa camera ug milingkod sa salog diin misenyas sa iyahang duha ka kamot ug midistansya sa frame.
Miingon pa si Martin, nga basin og nag-affair ni sila o ulawon lang gyud. Apang dali nga mikatag ang video sa social media diin nakahatag kini og diskusyon sa kadaghanan.
Gipakita pa sa laing report nga posibleng gi-erase na sa asawa ni Byron ang iyahang apelyido sa Facebook human sa panghitabo.
Wala pa’y pamahayag nga gipaguwa si Byron ug Cabot labot sa maong panghitabo.
Apan, gisugdan na kini sa mga netizen ug gitawag nga wala gayuy aso nga makumkum kung ang usa magdula ug kalayo.
