Usa ka buta gitungas ang Mt. Apo

DAVAO CITY- Daghan ang nakadayeg sa usa ka lalaki nga maoy pinaka-unang buta nga nakahimo sa pagsaka sa pinakataas nga bundok sa Pilipinas nga mao ang Mt. Apo niadtong Oktobre 1 ning kasamtangang tuig. Sa post sa usa ka guide nga si Angel Pandoy, makita ang maong lalaki nga nakaabot ug nasaka gayud ang pinaka tumoy sa maong bundok ug ang mas labaw pa niini, misaka ang maong lalaki nga walay sul-ob nga bisan unsa maong sapatos o hapin sa tiil. Giila ang maong lalaki nga si Bennie Cambang, 39 anyos ug residente sa Sitio Tumpis, Barangay Sibulan, Davao del Sur. Makugihon ug dakong garbo sab nga gigiyahan ni Angel Pandoy ang maong lalaking buta sa pagtungas sa Mt. Apo diin miagi sila sa Sta. Cruz Back Trail (Boulder Face). Daghan ang midayeg sa maong lalaki ug daghan usab ang na-inspire sa determinasyon niini nga nagpamatuod gayud nga walay bisan unsang butang ang makababag sa gustong buhaton sa usa ka tawo.