Na-ugdaw ang usa ka 2-storey nga balay kagahapon sa kadlawon adlawong Domingo, Hunyo 1, sa San Francisco Village, Zone 4, Matina Crossing, ning syudad.
Ang maong sunog misubay padulong sa ikaduhang andana sa maong balay ug dali kining mikatag sa ubang parte sa maong istruktura.
Subay sa inisyal nga report sa Davao City Fire District, usa matud pa ka pamilya nga gilangkuban og upat ka mga indibidwal ang naapektuhan sa maong insidente.
Hinuon walay nataho nga adunay samdan o namatay sa maong sunog, apan nahasubo lamang ang mga biktima gumikan nawagtang ang ilahang personal nga mga butang ug panimalay tungod sa kusog nga kalayo.
Dali sab nga napalong ang kalayo pinaagi sa hapsay ug paspas nga pagresponde sa mga bumbero gikan sa Talomo Fire Station.
Hingpit nga napalong ang kalayo sulod lamang sa pipila ka minutos human kini ma-report sa hotline sa Bureau of Fire Protection.
Sa karun, padayon pa ang imbestigasyon sa hinungdan sa maong sunog samtang gibanaba pa sab ang kantidad sa kadaot nga nahimo sa maong insidente.
Giandam na usab ang posibleng hinabang alang sa naapektuhang pamilya.
Subling nag-awhag sab ang mga otoridad ngadto sa publiko nga magmatngon ug siguraduhon ang kahimtang sa ilang kuryente ug mga gamit sa panimalay aron malikayan ang susamang insidente.
