Gikatakdang mosulod sa Philippine Area of Responsibility (PAR) karong bulana ang usa hangtud duha ka tropical cyclone, subay sa pahibalo sa Philippine Atmospheric, Geophysical and Astronomical Services Administration (PAGASA).
Sumala pa sa forecast nga gipaguwa sa state weather bureau kagahapong adlawa, aduna matud pay upat ka posible nga agianan sa mga bagyo karong bulan sa Hunyo lakip na ang paingon gawas sa nasud kon recurving scenarios ug ang mga posibleng moigo sa yuta kon landfalling scenarios.
Gipasabot usab sa PAGASA nga bisan pa man og dili moigo sa yuta ang bagyo, dako gihapon ang posibilidad nga kini makapalig-on sa hanging habagat, nga magresulta sa kusog nga mga pag-ulan sa nasud.
Niadtong Biyernes, opisyal nang gipahibalo sa PAGASA ang pagsugod sa habagat season, diin timailhan sa pagsugod sa panahon sa ting-ulan sa nasud.
Sa mga senaryo nga moigo ang bagyo sa yuta, posible kini moigo sa sidlakang bahin sa Southern Luzon o Eastern Visayas, human mulabang kini padulong sa West Philippine Sea, ayha mopadulong sa dapit sa Vietnam ug Hong Kong.
